Muqdisho, Talaado, Feb, 5, 2013----Ra’iisal Wasaaraha Xukuumadda Federaalka Soomaaliya Mudane Cabdi Faarax Shirdoon (Saacid) ayaa maanta ku dhawaaqay dhismaha Guddi madax banaan oo ka shaqeeya ka soo talabixinta xadugudbyada ka dhanka ah xuquuqda Bani’aadamka, gaar ahaana falalka kufsiga loo geysto dumarka Soomaaliyeed iyo dilalka loo gaysto  shacabka iyo Wariyeyaasha.

Munaasabad ka dhacday xafiiska Ra’iisal Wasaaraha ayaa maanta looga dhawaaqay guddigan, waxaana xaadir ku ahaa goobta dhamaanba xubnaha Guddigan oo ka kooban 13 xubnood, kuwaasoo laga soo dhex xulay Bulshada qeybaheeda kala duwan waxaana ka mid ah, Garyaqaano, Dadka u Dhaqdhaqaaqa Xaquuqda Dumarka, Culumaa’udiin, Saraakiil Boolis oo caan ah, iyo Hogaamiyayaasha Daladaha Waxbarashada. Iyadoo Guddigani uu heysto muddo 3 bilood ah si uu ugu soo gudbiyo Xukuumadda warbixin rasmi ah oo la xariirta habka ugu fudud ee looga hortagi karo falalka liddiga ku ah xuquuqda aadanaha iyo sharciga islaamkaba, gaar ahaana Kufsiga iyo dilalka lagula kaco dadweynaha iyo weriyeyaasha ka howlgala dalka.

“Kufsiga iyo dilka wariyayashu waa laba arrimood oo ah ku xadgudub xuquuqda bani’adamka aad ayeeyna noo xanuujinaysaa arrinkaas ka dowlad ahaan, maahan mid aanu u dulqaadanayno inay sii socoto” ayuu yiri R.wasaare Saacid oo xusay in xilligan oo ay Soomaaliya sameyneyso horumar dhan kastaba leh, loona baahan yahay in laga hortago falalkan oo dib u dhigaya horumarka dalka iyo dalkaba.

“Si aan dadaalkeena u sii kordhino waxaan maanta samaynay Gudigan madaxa banaan oo talo naga siin doona arrimaha la xariira kufsiga iyo dilalka, waa guddi laga sugayo inay keenaan xaqiiqda ku salaysan tacadiyada ka dhacay dalka, talo cadna naga siiyaan wixii keenay falalkan soo noqnoqday” ayuu yiri R.wasaare Saacid oo tilmaamay in sababta guddigan loo magacaabay ay tahay welwelka badan ee ay nagu hayso falalkan ka dhanka ah Xaquuqda Bani’aadamka.

Sidoo kale, waxaa goobta ka hadlay Guddoomiyaha Guddigan Drs. Maryan Yusuf Sh. Cali, waxayna sheegtay in muddo 15 sano ah ay ku howlanaayeen difaaca Xuquuqda aadanaha iyo horumarinta Haweenka, “Riyadaydu markasta waxay ka turjumaysaa sidii wax loogu qaban lahaa haweenka oo ah dadka ugu jilicsan Bulshada, lafdhabarna u ah” ayay tiri Drs Maryan waxayna intaas ku dartay inay dadaal u gali doonaan sidii ay u raadin lahaayeen xaqiiqda ku salaysan cida ka danbaysa kufsiga dumarka iyo dilalka wariyayaasha. lagana soo diyaariyo warbixin si loogu gudbiyo laamaha sharciga si tilaabo looga qaado.

Arrintani waxay timid markii ciidamada dawlada qaar ka mid ah lagu eedeeyey falal ka dhan ah xuquuqda aadanaha, oo ay ka mid tahay kufsi dumar shacab ah iyo xabsi loo geystay qaar ka mid ah wariyayaashii wax ka qoray arrintan. Maxkamadii la saaray wariyaha iyo gabadha kufsiga ku eedyasay ciidamada dawlada ay maanta ku xukuntay min hal sano oo xarig ah, taasoo dad badan ay cadaalad darro ku tilmaameen.

Ugu danbayntii  Ra’iisal Wasaare “Saacid” ayaa sheegay isaga oo ka faa’iideysanaya fursadan in uu si diiran u soo dhoweeynayo baaqii Xoghayaha Guud ee Q/midoobay Mr. Ban Ki-moon uu ka hor jeediyay Golaha Ammaanka taasoo uu ku dalbanayay in la tixgeliyo codsiga Dowladda ee Qaadista Xayiraada Hubka ee saaran Soomaaliya tan iyo 1992.

Gelinsoortimes.com newsdesk