Garoowe(GT)Maamulka Puntland oo ka hadlay banaanbaxyada shalay iyo doraad ka dhacayey magaalada Gaalkacyo iyo siyaasiyiinta dhaliilsan muddo korarsiga uu sameystay maamulka Faroole ayaa waxa uu sheegay maamulka Puntland uu tilaabo adag ka qaadi-doono cid kasta oo uu u arko inay caqabad ku tahay maamulka iyo homarka shacabka Puntland.

Wasiirka warfaafinta Puntland Eng. Maxamuud Caydiid Dirir oo shalay warfidiyeenka Puntland la hadlay ayaa sheegay in dad ku fashilmay siyaasadda Puntland iyo tan guud ee dalka ay doonayaan sida uu yiri inay khalkhal gelinyaan amaanka Puntland, wuxuuna intaasi ku daray in shaqsiyaad maamulka Puntland hormarka uu gaaray diidan, kana soo horjeeda geedi socodka dimuqraadiyadda iyo in dalku uu ka gudbo nidaamka qabiilka ay wadaan banaanbaxyo iyo hadalo dacaayado ah, kuwaas oo uu sheegay inay talaabo adag ka qaadi doonaan haddii ay ka waantoobi-waayaan falalka ay wadaan sida uu yiri.

“Waad ogtihiin in bishii April ay Isimada, Cuqaasha, mas’uuliyiin ka socotay dowladda Puntland iyo qeybaha kala duwan ee bulshadu ay ansixiyeen dastuur iyo in loo gudbo nidaamka axsaabta badan, dadka diidan waa dad aan dalka dan u heyn, Feberaayo sanadka soo socda ee 2013-ka waxaa bilaamaya ololaha ururada siyaasadda” ayuu yiri wasiirka warfaafinta maamulka Puntland.

Dhinaca kele wasiir Dirir waxa uu ka hadlay howlgalada dadka lagu xirxiray magaalada Garoowe, wuxuuna sheegay in dadka la qabtay ay ahyeen shaqsiyaad amaan daro abuurayey, wuxuuna yiri “Dadka la xiray waxay ahaayeen dad rabay inay shir aan sharci aheyn abaabulaan iyo kicin dadweyne, waana la xirayaa cid kasta oo ka hortimaada shuruucda Puntland, ama loo arko inay amaanka khalkhal-gelinyso, caalamka oo dhan dal waxaa maamula ama shir guud iclaamiya dowladdiisa”.

Hoos ka daawo banaabaxii shalay ka dhacay magaalada Kaalgacyo

Gelinsoortimes